LAOAG CITY – Kasapulan nga adalen a naimbag ti Department of Finance (DoF) ken Department of Budget and Management (DBM) ti ilunglungalong ni Senador Erwin Tulfo a mangipataw ti maysa a bolan nga income tax holiday para kadagiti mangmangged iti baet ti isyu a binilyon a maanomalya a ghost flood control projects.
Para ken ni Special Assistant to the President for Investment and Economic Affairs (SAPIEA) Frederick Go, ti ilunglungalong ni Tulfo ket dakkel nga isyu a kasapulan a maadal a naimbag babaen kadagiti maseknan nga ahensya ti gobierno.
Immunan nga inlungalong ni Senador ErwinTulfo ti Senate Bill 1446 wenno ti One-Month Tax Holiday of 2025, a gagem na a bigbigen ti pagkasapulan a maipaayan ti pakalag-anan ken maisubli ti benepisyo kadagiti karaman iti working population.
Iti babaen ti gakat, ti one-time na one-month income tax holiday wenno saan a panagbayad ti buwis para iti maysa a bolan a napastrek ket maiyaplikar kadagiti individual taxpayers nga umaw-awat ti sweldo.
Naipalaon pay iti gakat a no mapagbalin daytoy a linteg ket ipatungpal a dagus iti umuna a payroll month dagiti mangmangged.
Nailawlawag iti gakat a saan a sakopen ti nailungalong a tax holiday dagiti mandatory contributions iti Social Security System (SSS), Government Service Insurance System (GSIS), Philippine Health Insurance Corporation (PhilHealth), Home Development Mutual Fund (Pag-IBIG), loan amortizations, ken dadduma pay a voluntary payments nga ipalpalubos ti empleyado.
