LAOAG CITY – Naimaldit ti innem a baro a kaso ti covid-19 ditoy probinsya.
Gapu iti daytoy, umaboten iti 49 ti kabuklan a bilang dagiti positibo iti sakit.
Iti inparuk-at a datus ni Gov. Matthew Marcos Manotoc, dagiti nagpositibo ket karaman kadagiti 44 a nakapulapol dagiti immunan a nagpositibo iti virus.
Dagiti lima a nagpositibo ket residente iti Brgy. 9 iti ili ti Sarrat ken ti maysa ket iti Brgy. 11 iti met laeng nasao nga ili.
Ni IN-C44 ket maysa a babai nga agatawen ti 60; IN-C45, lalaki nga agtawen ti 39; IN-C46 ket maysa nga ubing a babai nga agtawen ti 10; IN-C47 ket agtawen ti 34 a babai; IN-C48 ket babai nga agtawen ti 42 ken ti IN-C49 ket lalaki nga agtawen ti 63.
Kabayatanna, ni IN-C49 ket symptomatic wenno addaan ti sintomas ti covid-19 idinto a dagiti lima ket asymptomatic.
Agpapada dagiti innem a baro a kaso nga awanan ti travel history.
Mainaig iti daytoy, dagus a naipan iti isolation dagiti nakapulapolda, naipadalan iti swab test ken naiget ti panangmonitor dagiti healthcare providers.
Kabayatanna, iti inparuk-at nga executive order ni Mayor Remigio Medrano iti ili ti Sarrat, agtultuloy ti pannakaipatungpal ti lockdown iti Sitio 1 agingga sitio 5 iti barangay 9, san Lorenzo; Sitio 1 agingga sitio 3 iti barangay 12-San Bernabe; sitio 6 ken 7 iti barangay 8-San Antonio; sito 1-3 iti barangay 11- Sta. Rosa; sumagmamano a paset ti sitio 1, 3 ken 5 iti barangay 10- San Miguel; ken sumagmamano a paset ti purok Guidday ken 4 iti barangay 16-Sto. Santiago.
Agtalinaed a nakarikep ti Sta. Rosa Market, Sarrat Manamnama Multipurpose Coop. Ken ti municipal slaughter house Sta. Rosa.
Nailanad iti E.O ti strikto nga stay at home policy, pannakaobserbar dagiti health protocols.
Karaman pay ti panangipan ti registry logbook dagiti pagatengan a mabalin a pagibasaran ti contact tracing, maipawil ti panagpupulapol ken maysa laeng a tao ti mapalubusan a rumuar tapno gumatang kadagiti kasapulan iti pagtaengan.
Iti sabali a bangir, kinumpirmaran ti PGIN Communications & Media Office iti kapitolyo probinsyal nga addan ti maysa a pimmusay gapu iti covid-19 ditoy probinsya ken daytoy ket ni IN-C36 a taga Barangay 9 iti ili ti Sarrat.
