LAOAG CITY – Natiliw dagiti innem a lallaki gapu ti panagtutupada da iti Brgy. 61 Cataban ditoy siudad ti Laoag.
Daytoy ti kinumpiramran ni Police Lt. Col. Amador Quiocho, hepe ti PNP Laoag iti pannakiuman ti Bombo Radyo Laoag.
Kuna na a naiyuswat ti iligal a panagtutupada dagiti innem iti farm a kukua iti agnagan ti Rhayan Caballero, agtawen ti 36, residente iti nasao a barangay.
Inbatad ni Quiocho nga arig nga indauloan ni Caballero, maysa kadagiti natiliw ket ni Barangay Chairman Larry Alejandro gapu ti nasao a tupada.
Segun kenni Quiocho, no awan ti nangidaulo iti iligal nga aktibidad ket awan dagiti matiliwan.
Malaksid kada Alejandro kenni Caballero, binigbig pay ti hepe dagiti uppat nga isuda Van dela Cruz, agtawen ti 20; Reynaldo Socobos Agoy, agtawen ti 40; John Kennedy Juan, agtawen ti 26; Neil Jay dela Cruz, agtawen ti 35, agpapada a residente iti Brgy. Navotas ditoy siudad.
Inbatad ni Quiocho nga arigen a galyera iti lugar gapu iti rinibribo a pusta ti nakumpiskar dagiti otoridad.
Umabot iti 77 a ribo a pisos, 38 a ribo a pisos, 35 a ribo a pisos dagiti nakumpiskar a pusta da.
Inlawlawag ni Quiocho a ti 38 a ribo a pisos ket nakumpiskar manipud kenni Kapitan Alejandro, 35 a ribo kenni Caballero, ken nababa a kantidad dagiti nakumpiskar manipud kadagiti dadduma a natiliw.
Saan da a nagabenan a tiliwen amin dagiti tattao iti nasao a lugar ketdi dagiti tinukmaan da ket dagiti kangrunaan a suspek.
Mamati ni Quiocho nga adda dagiti dumaydayo iti Brgy. Cataban a mapan makipaset iti panagtutupada ken maysa a lawasen a maonmonitor ti nasao a lugar.
Rumrumwar nga agakar-akar ti lugar da nga agtutupada tapno maiyaw-awan da dagiti otoridad.
Innayon ni Quiocho a maisagsagana ti maipila a reklamo kontra kadagiti innem a lallaki iti panagsalungasing iti PD 1602 wenno Anti Illegal Gambling Law.
Maipalagip a natiliw manen ni Kapitan Alejandro gapu iti panagtutupada iti Brgy. Nangalisan ditoy siudad itay bulan ti Hunyo.
