LAOAG CITY – Natiliw dagiti innem a lallaki gapu ti panagsusugal da iti Brgy. 21, San Agustin iti ili ti San Nicolas.
Binigbig ni Police Chief Master Sgt. Michael Rasay, iti PNP San Nicolas dagiti suspek a da Rey Butay y Pacleb, agtawen ti 28; Alfie Guira, agtawen ti 34, tricycle driver; Joseph Butay y Pacleb, agtawen ti 27; Loreto Tolentino y Regahal, agtawen ti 36; Nickson Gabug kenni Jojo dela Cruz y Butay, agtawen ti 35, chief tanod, agpapada a residente iti residente iti Brgy. 19 kenni Warmboy Acosta y Valdez, agtawen ti 25, residente iti Brgy. 21 iti nasao nga ili.
Naaktuan dagiti otoridad ti panagsusugal dagiti maseknan ti “PUSOY” iti pagtaengan ni Tolentino.
Gapu iti daytoy, nakumpiskar dagiti otoridad ti maysa a set ti baraha, 160 a pisos a pusta ken dadduma pay a nausar iti panagsusugal.
Nakalibas met ni Nickson Gabug bayat ti operasyon dagiti otoridad.
Nagtalinaed dagiti maseknan iti kustudyar ti PNP San Nicolas bayat a maisagsagana ti maiyannatop a maipila a reklamo kontra kadagiti suspek.
Kabayatanna, nagpanawagan ni Rasay iti publiko no siasinno ti nakakita kenni Gabug ket ipakaammo laeng iti lokasyon na para iti pannakatiliw na.
Kinumpirmaran pay ni Rasay a saan a nakasuot ti facemask dagiti suspek bayat ti panagsusugal da.
Innayon na nga adda dagiti naaw-awat da a report seknan iti iligal nga aktibidad dagiti maseknan ngem idi kalman laeng a naaktuan ken natiliw da dagiti nagsusugal.
