LAOAG CITY – Kinumpirmaran ni Sang. Bayan Gil Buenavista iti Sta. Praxedes, Cagayan nga innem a baro a landslides ti napasamak iti nagbedngan ili da ken ti Pagudpud, Ilocos Norte.
Segun kenni Buenavista, puro daga ti agay-ayos iti kalsada ken saanen a mapagnaan dagiti tattao.
Gapo iti daytoy, kunana a ti mandar ni Mayor Esterlina Aguinaldo iti nasao nga ili ket amin a na-stranded iti ili ti Pagudpud ket agsubli iti naggapwan da ken saan dan nga agtuloy nga agpa-Cagayan gapo ta saan da met laeng a makadalyasat.
Inbatad na a dagiti met na-stranded iti ili da ket mapan da pay laeng iti evacuation center tapno makainana ken makapangan da bayat nga agtultuloy ti clearing operation nga iyus-uswat da.
Naamoan nga adda pay dagiti naka-standby a kameng ti pulisya iti ili ti Sta. Praxedes a mangbalakad kadagiti motorista a saan agsubli da iti naggapwan tapno maliklikan da ti anyaman a peggad.
Inpasigurado met ni Buenavista a kumpleto ti ayuda kangrunaan na dagiti makan a maibunong kadagiti na-stranded.
Innayon na nga uray narisgo ti sitwasyon ita iti nasao a lugar ket agtultuloy latta ti clearing operation babaen ti panagtinnulong ti lokal a gobierno ti Pagudpud ken Sta. Praxedes.
Kabayatanna, kuna pay ni Buenavista nga iti sumagmamano a barangay iti Sta. Prexedes ket dagiti laeng galba ti pagtaengan ti makitkita gapo iti layos ken landslide.
