LAOAG CITY – Napilaan ti panagsalungasing ti PD1602 wenno illegal gambling law dagiti natiliw a nagsusugal iti maysa a minatayan iti Brgy. 24 Nagbuyugan Paoay.
Segun ken ni Pol. Capt. Eddie Suyat, hepe ti PNP Paoay, sakbay a naiyuswat ti illegal gambling operation ket uppat a rabii a minonitor da dagiti suspek.
Nabigbig dagiti suspek a da Dexter Jay Amita y Allado, agtawen 21, awanan asawa, Loy Agulay y Semana, agtawen 46, mannalon, Elmer Agulay, agtawen 51, naasawan, agpapada a residente iti Brgy. 24 Nagbuyugan Paoay; Bobby Gallego y Ramos, agtawen 22, mekaniko, Nicomedes Bulong y Villanueva, agtawen 54, company driver kenni Jonel Gallego y Ramos, agtawen 51, naasawan ken agpapadada a residente iti barangay Baay iti siudad ti Batac.
Nakumpiskar dagiti otoridad ti pusta nga agdagup 7,480 a pisos, lamisaan, tugtugaw ken dagiti baraha nga inusar da a naggaayam ti tong-it.
Iti agdama, nagtalinaed pay laeng dagiti maseknan iti kustodyar ti PNP Paoay.
