LAOAG CITY – Kinumpirmaran ni Barangay Chairman Reynaldo Garcia iti Barangay Palongpong iti ciudad ti Batac a kalugaran da ti driver ti nagluganan ti nurse a taga Barangay 8 ditoy ciudad ti Laoag a naggapo idiay Metro Manila a nagpositibo iti coronavirus.
Gapo iti daytoy, kuna na nga inpatungpal na ti lockdown kadagiti innem a pagtaengan nga adda iti compound a pagnanaedan ti driver.
Inbatad na nga awan pulos ti rumwar ken dagiti opisyal ti barangay ti mapan aggatang ti kasapulan dagiti maseknan a pamilya.
Segun kenni Garcia, daytoy ket paset iti panangprotehir da iti barangay da bayat a maiyur-uray ti resulta ti swab test ti driver a naiyuswat ita nga aldaw.
Mangnamnama dagiti kabarangayan na nga agnegatibo ti resulta ti test ti driver.
Mainaig iti daytoy, inadmitir ti kapitan a ti driver ket napan nakiminatay iti Sitio da isut gapo na nga adda ti panagamak dagiti kabarangayan da kalpasan nga adda ti interaksyon na kadagitoy.
