LAOAG CITY – Manamnama a dumanon iti innem a ribu a gangganaet a Philippine Offshore Gaming Operators workers ti tumalaw ditoy pagilian sakbay ti deadline inton Disiembre 31.
Mainaig iti daytoy, ginutigot ni Immigration Commissioner Dana Sandoval dagiti gangganaet a Philippine Offshore Gaming Operators workers nga ag-downgrade ti visa-da ken inpettengna a saanen a maiyalud-od pay ti December 31 deadline para iti total ban ti Philippine Offshore Gaming Operators iti pagilian.
Inbatadna a masapol a sumurotda kadagiti pagannurotan no kalikagumda nga agsubli ditoy Pilipinas iti masangoanan kas no adda ti mapanawanda nga nga annak ken asawa ditoy pagilian.
Kunana a nasken a tumalaw ditoy pagilian kas paset ti downgrading ngem mabalin nga agsublida no addaanda ti lehitimo a rason tapno agsubli ditoy pagilian.
Nagballaag ni Sandoval a ti pannakapaay a sumurot iti pagalagadan ket mangitunda iti panag-blacklist kadagitoy.
