LAOAG CITY – Balligi a natiliw ti maysa a lalaki iti inyuswat nga anti illegal drug buybust operation dagiti kameng ti PNP-Laoag ken PDEU iti Brgy. 8 ditoy siudad ti Laoag.
Nabibig ti suspect a ni Michael James Felipe, agtawen ti 34 ken residente iti Brgy. 10 ditoy siudad.
Iti operasyon, maysa a pulis ti nagpammarang a poseur buyer ken maysa a sachet ti maatap a shabu ti nausar iti transaksyon.
Malaksid iti dayta, nakumpiskar manipod iti ikot ti suspek ti nayun a lima a sachet ti maatap a shabu.
Naamoan a maysa ni Felipe kadagiti High Value Individual ken miembro ti drug group nga agop-operar ditoy probinsya.
Kabayatanna, inpetteng ni Felipe a naminpinsanen nga inibbatan na ti iligal nga aktibidad addan innem a tawen ti napalabas.
Kuna na a kellaat lattan a sinabat dagiti otoridad kabayatan ti panagawid na manipod iti nagubraan na a pagtaengan.
Inabatad na a naipasuksok kenkuana ti sangaribo a pisos pakairamanan ti iligal a droga.
Innayun ni Felipe a sipud rimuar iti pagbaludan ket saanen a pulos a nagaramid iti aniaman nga iligal nga aktibidad.
