LAOAG CITY – Inbatad ni PLt. Col. Joemar Labiano, ti hepe ti PNP ditoy siudad ti Laoag nga awan ti pakainaigan ti politika iti naiyuswat a search warrant operation iti pagtaengan ti maysa a barangay tanod iti Brgy. 26 ditoy siudad.
Kuna na a naiyuswat ti operasyon kalpasan a nakupirmaran a nagsubli iti iligal nga aktibidad ti subject babaen iti sumagmamano a surveillance iti daytoy.
Inbatad na a paset daytoy ti anti illegal loose firearms operation ti kapulisan.
Inlawlawag ni Labiano a ti nasao nga addang ti kapulisan ket karaman iti pannakaliklik ti pannakaaramt kadagiti armas ita nga eleksyon.
Nagpanawagan ti hepe kadagiti addaan ti ikot nga armas nga ideposito pay laeng iti kuerpo ti pulisya agingga a saan a malpas ti eleksyon.
Maipalagip a nasukimat dagiti otoridad iti pagtaengan ti nagbalin a subject ti operasyon iti Brgy. 26 ditoy siudad ti 11 a sachet a naglaon ti maipagarop a shabu ken dua a plastic residue, drug paraphernalia ken maysa a kalibre 38 a paltog nga addaan ti lima a bala.
Daytoy ti maysa kadagiti positibo nga operasyon dagiti otoridad manipod iti innem a naiyuswat a search warrant operation idi kalman iti nagduduma a lugar ditoy probinsya.
