LAOAG CITY – Natay ti innem a tattao a pakairamanan ti tallo a bombero kalpasan a naidungpar iti maysa a lugan ken simmabog ti truck a nagkarga ti 60 tons a liquefied natural gas iti ciudad ti Ulaanbaatar a kabisera ti Mongolia.
Malaksid kadagiti natay ket adda pay ti 11 a sabsabali dagiti nasugatan kalpasan a nagkayamkam ti apoy kadagiti asideg a pasdek iti nadakamat a lugar.
Ginasut a bombero a naipatulod iti nakapasamakan ti insidente tapno agtitinnulong a mangsebseb ti dakkel nga apoy.
Basar kadagiti agnanaed iti lugar, inpagarop da nga adda ti eroplano a simmabog.
Mainaig iti daytoy, kinumpirmaran ti Mongolian National Emergency Management Agency a karaman kadagiti nasugatan ket uppat nga ubbing.
Inpasigurado met ni Mongolian deputy prime minister Sainbuyan Amarsaikhan nga awan dagiti pimmusay manipod kadagiti nauram a pasdek.
Agtultuloy ti imbestigasyon dagiti otoridad mainaig iti nasao a pasamak.
