LAOAG CITY – Agtultuloy ti imbestigasyon dagiti otoridad iti pannakatay dagiti innem a tattao kalpasan ti pammaltog iti estado ti Mississippi, idiay Estados Unidos.
Basar iti impormasyon, amin dagiti biktima ket agga-asideg laeng ti ayan da iti bassit nga ili ti Arkabutla, agarop 45 a milya iti abagatan ti Memphis, iti Tennessee.
Tallo kadagiti biktima ket nabirukan iti uneg ti dua a pagtaengan idinto a dagiti dadduma ket nakita iti pagtagilakoan, lugan ken iti kalsada.
Kinumpirmaran met dagiti otoridad nga adda iti kustudiyar da ita ti suspek a ni Richard Dale Crum ken mapilaan ti kaso a murder.
Kadua met dagiti local police ti state bureau of investigation tapno maimbestigar pay a nasayaat ti napasamak.
Naamoan a maysa kadagiti nagbalin a biktima ket ti dati met laeng nga asawa ti suspek.
Mainaig iti daytoy, kuna met ni Mississippi Governor Tate Reeves a rumrumuar a maymaysa ti suspek iti panangaramid ti krimen ngem saan pay a nalawag no anya ti motibo na.
Inpasigurado na met nga adda ti full resources iti estado kadagiti law enforcement para iti pangtultuloy ti naig-iget pay nga imbestigasyon.
