LAOAG CITY – Innem nga indibidual ti tiniliw dagiti otoridad gapu iti illegal a panagsusugal iti Barangay 15, San Jose iti ili ti San Nicolas.
Immun-una iti daytoy, nakaawat ti report ti Philippine National Police (PNP) iti ili ti San Nicolas mainaig iti panagsusugal dagiti suspek iti nasao a barangay.
Iti panagresponde dagiti otoridad ket naaktwan da dagiti suspek nga agay-ayam ti “rakatak”.
Nakumpiskar dagiti otoridad iti lugar ti maysa set ti baraha, 557 a pisos, lamisaan, 5 a mono block chair, maysa nga steel chair ken arpaw ti lamisaan nga agmaris ti grey.
Nagtalinaed iti kustodyar ti PNP iti ili ti San Nicolas dagiti suspek ken manamnama a sumango dagitoy iti reklamo a panaglabsing iti Presidential Decree (PD) 1602 wenno illegal a panagsusugal.
