LAOAG CITY – Natiliw dagiti innem nga indibidual idinto a nakalibas dagiti pito a sabsabali pay iti naisayangkat nga Anti-illegal gambling operation iti maysa a minatayan iti Sitio 4, Brgy. 40, Balatong ditoy siudad ti Laoag.
Nabigbig dagiti natiliw nga agtawen ti 31, awanan ti asawa; agtawen ti 36, awanan ti asawa; agtawen ti 57, naasawaan; agtawen ti 34, awanan ti asawa; agtawen ti 29, baro, agpapada dagitoy a residente ditoy siudad ti Laoag ken ti agtawen ti 40, naasawaan ken residente iti Brgy. Nagbalagan iti ili ti Bangui.
Basar ti report, nangiyuswat a dagus ti operasyon dagiti kameng ti Laoag City Police Station, kadwa da dagiti personnel ti Prov’l Special Enforcement Team, Intelligence unit Ilocos Norte Police Provincial Office, ken Regional Office kalpasan a nakaawat da ti report nga adda ti agsusugal iti minatayan iti nadakamat a barangay.
Apaman a nakadanun dagiti otoridad iti lugar ket naaktuwan da dagiti suspek nga agay-ayam ti “Lucky 9” a nakatiliwan dagiti innem a suspek idinto a nakataray dagiti pito a sabsabali pay.
Nakumpiskar dagiti otoridad iti lugar ti 40 a pedaso ti baraha, siyam a tugaw, maysa a lamisaan, ken ti maipagarop a pusta dagiti suspek a 3,854 a pisos.
Iti agdama, nagtalinaed dagiti suspek iti kustodyar ti pulisya ken maisagsaganan ti kaso a panaglabsing ti Presidential Decree (PD) 1602 wenno illegal a panagsusugal kontra kadakuada.
