LAOAG CITY – Balligi a natiliw dagiti innem nga indibidual ken pito met dagiti nakalibas gapo iti iligal a panagsusugal da iti maysa a minatayan iti paset ti Barangay 20 ditoy ciudad ti Laoag.
Nabigbig dagiti natiliw nga isuda Gilbert Luyon, agtawen ti 50, naasawaan ken residente iti Brgy. 21, Laoag City; Gilbert Santos, agtawen ti 51, naasawaan; Randy Mariano, agtawen ti 36, awanan ti asawa, maysa a tricycle driver; Joel Saturnino, agtawen ti 42; Johnville Satunino, agtawen ti 28 ken Jerwin Millado, agtawen ti 40, agpapada a residente iti Brgy. 20 ditoy ciudad ti Laoag.
Adda met dagiti nakalibas nga isuda Jun Jun Saturnino; Edward Saturnino; Maynard Saturnino ken Aileen Mariano, agpapada a residente met laaeng iti nadakamat a barangay.
Segun iti Philippine National Police ditoy ciudad ti Laoag, dagiti nadakamat a natiliw ken naglibas ket naaktoan a nagay-ayam ti Lucky 9.
Inbatad ti Philippine National Police nga adda pay ti nagay-ayam ti tong-its ngem dagitoy ket nakalibas a nabigbig a ni Corazon Hernando ken dua pay a saan pay a nadeterminar.
Nakumpiskar dagiti otoridad iti Table 1 wenno iti nagay-ayam dagitoy ti Lucky 9 ti baraha, tallo a monoblock chair, lamisaan ken ti pusta a 4,540 a pisos ken iti Table 2 a nagay-ayam ti Tong-its ket ti baraha, dua a mono block chair, plastic a lamisaanken ti pusta a 488 a pisos.
Iti agdama, nagtalinaed iti kustudiyar ti Philippine National Police – Laoag dagiti natiliw ken maisagsaganan ti kaso a maipila kontra kadagitoy.
