LAOAG CITY – Inadmitir ni Mr. Jerry Carreon, School Principal ti Ilocos Norte National High School nga agkurang ti pagadalanda ti agarup 40 a klasrum kagiddan ti panaglukat ti klase ita nga aldaw, Hunio 16.
Nupay kasta, inlawlawagna nga adda dagiti addang nga inaramidda tapno maakomodar latta dagiti estudiante kas ti panangguduada ti maysa a klasrum nga imbes a mausar dagitoy kas laboratory room tapno umanay ken adda ti pagianan dagiti agad-adal.
Inbatadna nga adda ti agarup 35 agingga 50 ti bilang dagiti estudiante iti kada klasrum.
Inpasingkedna a kumpleto dagiti mangisursuro ken staff a mangisuro ken mangbayabay kadagiti estudiante.
Mainaig iti daytoy, inpakaammo ni Carreon nga addan ti pundo a mausar para iti pannakaipasdek kadagiti nayon a klasrum ngem saan pay a nangrugi ti pannakaipatakderna.
Kunana nga adda ti maipasdek nga one storey building nga addaan ti 12 a klasrum no sadinno ket immay iti napalabas a lawas ti Department of Public Works and Highways tapno kitaen daytoy a proyekto.
Innayonna nga immadu dagiti nag-enroll nga estudiante iti nasao a pagadalan no maidasig iti napalabas a tawen.
Iti agdama, bayat a maisursurat daytoy a damag ket manarimaan pay laeng ti pannaka-consolidate ti datos ti bilang dagiti estudiante a simrek iti pagadalan ita nga umuna nga aldaw ti klase.
