LAOAG CITY – Agtultuloy ti inobasion kadagiti produkto nga abel ditoy probinsia.
Daytoy ti inpakaammo ni Provincial Director Amelia Galvez ti Derpartment of Trade and Industry.
Segun ken Galvez, saan laengen a pang-Filipiniana ken table runner dagiti abel cloth no di ket maus-usar payen daytoy iti panagaramid ti sapatos, bag, wallet, aritos ken daddum pay.
Inbatadna a kasapulan a makigiddan dagiti negosiante iti panawen nangruna ita ket adu dagiti agtaud a baro nga uso a produkto ngem maipangpangruna latta ti tradisional a produkto.
Mainaig iti daytoy, kuna ni Galvez a maysa pay ti Abel products ti kangrunaan nga iyaw-awid dagiti balikbayan ken turista kadagiti bukudda a pagilian.
Kabayatanna, inpasiguradona nga agtultuloy ti suporta a maited kadagiti babassit a negosiante ti inabel.
