LAOAG CITY – Ibilang dagiti eksperto a panaglabsing iti International Law dagiti inpatungpal nga air strikes ti Turkey iti north-east Syria a nangitunda ti pannakaputed ti suplay ti kuryente ken danom para iti nasurok a maysa a milyon a tattao.
Inpatungpal ti Turkey ti nasurok a 100 a panagatake iti nagbaetan ti Oktubre 2019 ken Enero 2024 a ti kangrunaan a pinuntirya da ket ti oil fields, gas facilities ken power stations iti Kurdish-held Autonomous Administration of North and East Syria (AANES).
Naamoan a dagiti nasao a panagatake ket nangitunda pay ti humanitarian crisis iti rehiyon.
Gapu iti daytoy, agdepdependar lattan ti nasurok a maysa a milyon a tattao iti Hassakeh province manipod kadagiti maideliber kadakuada babaen ti tanker iti inaldaw a ti kangrunaan a prayoridad a maipaayan ket dagiti pagadalan, orphanages ken ospital.
Nupay kasta, dagiti maideldeliber a danom ket saan pulos a makaumanay para iti amin a residente iti nadakamat a lugar.
