LAOAG CITY – Gutgutigoten ti Ilocos Norte Provincial Jail dagiti balud nga agmula ti nagduduma a klase ti nateng iti gardening iti pagbaludan.
Segun ken ni Jail Warden Edietor Guiang ti Ilocos Norte Provincial Jail, napintas daytoy nga addang para kadagiti balud tapno adda ti pakakumikuman ken mangted liwlawa kadakuada kabayatan ti kaaddada iti uneg ti pagbaludan.
Inbatadna a nakikoordinar daytoy iti Provincial Agriculture Office no sadinno nga inpasingkedda kenkuana nga adda ti mabalin nga ipaayda a bukbukel nga imula dagiti balud.
Inlawlawagna a napintas met ti pannakaipatungpal ti livelihood program-da kas ti hog raising a mabalin nga ilako dagiti balud dagiti tarakenda a baboy apaman a dumakkel dagitoy.
Innayonna a ti maurnong a kuarta ket mausar met laeng para kadagiti kasapulan ken pagsayaatan dagiti maseknan a balud.
