LAOAG CITY – Inlawlawag ni Police Major Jephre Taccad, ti pannakangiwat ti INPPO nga awan pay ti report a naawat da manipud iti Municipal Police Station ti Dingras ken Solsona seknan iti maipagarop a panagsibrong.
Segun kenni Taccad, iberipikar na daytoy iti chief of police kadagiti nadakamat nga ili.
Kunana nga adda pay ti kastoy a report kadagiti naglabas a tawen ngem kalpasan ti beripikasyon ket saan a pudno dagitoy.
Nupay kasta, inpasigurado ni Taccad nga imbestigaren da daytoy a banag iti laksid nga awan ti formal report.
Ummuna iti daytoy, nagwaras iti social media nga adda ti agsibrong wenno agala ti ubbing.
Kabayatanna, pinalagipan ni Taccad ti publiko a saan nga agpakampante kangrunaan na ita nga holiday season ken nasaysayaat no agbalin nga alerto.
