LAOAG CITY – Inpannakkel ti Ilocos Norte Police Provincial Office iti liderato ni Police Colonel Cesar Pasiwen dagiti naimbaligian nga operasion nga inwayatda manipod bulan ti Enero agingga itay napan a bulan ti Nobiembre iti daytoy a tawen.
Maibilang ditoy iti pannakaarestar dagiti 206 a Wanted Persons ditoy Ilocos Norte.
Karaman ditoy iti pannakatiliw ti maysa nga adda iti National Level, 11 iti babaen ti Provincial Level, 18 iti City ken Municipal Level ken pannakaarestar dagiti 176 a Common Wanted Persons.
Nakemmeg amin dagitoy kalpasan ti naiget a monitoring iti paglemlemmenganda a nangitunda iti pannakaarestarda.
Segun kenni Police Lieutenant Colonel Rafael Lero, Operations Officer ti INPPO, balligi pay iti pannakaarestarda kadagiti 219 nga adda pakainaiganna iti illegal gambling kalpasan dagiti inyuswatda a 38 a panagraut kadagiti illegal gambling operations iti napalabas a 11 a bulan.
Ti nasao nga operasion ket ditoy a nakumpiskar dagiti nagduduma a gambling paraphernalias ken kuarta a nausar iti ilegal a sugal.
