LAOAG CITY – Nagkedked paylaeng ti Ilocos Norte Police Provincial Office a nangipaay ti komento iti alegasyon ti dua a konsehal ditoy ciudad ti Laoag a maipagarop nga adda dagiti kameng ti pulisya nga agbalbalin a partisan ita a panawen ti eleksyon.
Nupay kasta, inpaganetget ni Police Major Sheryl Guzman, ti pannakangiwat iti Ilocos Norte Police Provincial Officer a ti laeng ar-aramiden dagiti kameng ti pulisya ket ti mangipaay ti seguridad kadagiti umili ken patas a serbisyo para kadagiti kandidato, pakairamanan dagiti supporters da.
Kuna na pay nga awan ti makita da nga Intense Political Rivalry isut gapuna a nagtalinaed iti green category ditoy probinsya.
Immuna iti daytoy, inrakurak dagiti dua a konsehal ditoy ciudad ti Laoag a maladingitan da iti panagbalin a partisan ti sumagmamano a kameng ti pulisya ditoy probinsya gapu ta protprotehiran dagiti sumagmamano a kandidato a maipagarop nga aggatgatang ti botos.
