LAOAG CITY – Nagkiddaw ti Ilocos Norte Police Provincial Office ti pannakaawat ti publiko mainaig iti pannakaiwayat ti Balikatan Exercises ditoy probinsia.
Segun ken ni P/Maj. Kristian Lee Badua, pannakangiwat ti Ilocos Norte Police Provincial Office, daytoy ket kalpasan nga adda ti pannakaiwayat ti live firing iti paset ti kabaybayan iti Barangay Metro Lapaz ken Barangay Talingaan ditoy siudad ti Laoag.
Gapu iti daytoy, adda ti pakaammoda kadagiti sumagmamano a mangngalap kadagiti nasao a barangay a saan pay laeng a mapan agkalap kabayatan a maisaysayangkat ti aktibidad a nangrugi iti maudi a lawas ti Abril agingga inton Mayo 7.
Inpasingkedna a nakikoordinarda kadagiti Local Government Units iti ili ti Badoc, Burgos, iti siudad ti Batac ken ditoy siudad ti Laoag para iti kinatalged dagiti maseknan a residente.
Kunana nga adda ti maipaay a tulong pinansial kadagiti mangngalap a naapektaran ti panagkalapda nga umabot iti sumurok lima ribu a pisos.
