LAOAG CITY – Inlawlawag ni Police Col. Julius Suriben, ti Provincial Director iti Ilocos Norte Police Provincial Office a dua nga aldaw sakbay ti isasaplit ti Bagyo Egay ket naan-anayen a nakasaga da.
Inbatad na nga idi adda ti report a possible a maysa ti Ilocos Norte kadagiti matamaan ti napigsa a bagyo ket inmadar a dagus ni Governor Matthew Marcos-Manotoc ti panagsagana da isut gapuna a nagtataripnong da kadwa da ti Provincial Disaster Risk Reduction and Management Office ken dagiti dadduma pay nga ahensiya ti gobierno.
Segun kenkuana, kalpasan iti panagtataripnong da ket pinagsagana da a dagus dagiti kameng ti kagiddan ti panangballaag da kadagiti residente nga agnanaed iti asideg ti baybay a saan da paylaeng a mapan tumappog wenno agdidigus.
Innayon na a karaman pay kadagiti binallaagan da ket dagiti agtagikua kadagiti resorts.
Mainaig iti daytoy, inpakaammo ni Suriben a kabayatan ti iduduprak ti bagyo Egay ket adda dagiti nakadeploy a rescue teams iti nagduduma a paset ti probinsiya tapno alisto laeng ti panagresponde da kadagiti agkasapulan ti tulong no kumaro ti sitwasyon ken adda dagiti nasken a maibakwit.
Kuna pay ti provincial director nga adda payen dagiti kameng ti Ilocos Norte Police Provincial Office a nadutukan a tumullong nga ag-repack kadagiti relief goods no sadinno nga inpasigurado na nga adda ti umanay a maibunong kadagiti maapektaran ti bagyo nga umili.
Kabayatanna, inpakaaamo ni Suriben ng aaddan ti 9 a pamilya ti na-preemptive evacuation iti ili ti Bangui, 18 iti ili ti Badoc ken adda pay ti manarimaan a maibakbawit iti iti ili ti bacarra.
