LAOAG CITY – Insumitiren ti Investigation Unit ti Ilocos Norte Police Provincial Office dagiti kasapulan a dokumento para iti kaso administratibo a maipila kontra iti pulis nga addaan ti ranggo a police corporal a suspek iti napasamak a pammaltog a nakatayan ti aglive-in partner iti Barangay 21 iti ili ti San Nicolas.
Daytoy ti inpakaammo ni Police Lt. Col. Michael Bautista, ti pannakangiwat iti Ilocos Norte Police Provincial Office.
Segun ken ni Bautista, ti Internal Affairs Service ti mangtututuk para iti imbestigasyon kontra iti nasao a suspek.
Inlawlawag na a kalpasan ti pannakaisumitir dagiti kasapulan a dokumento iti Regional Office ti Philippine National Police ket isudan ti mangtingiting iti kaso ti nasao a pulis.
Immuna iti daytoy, adda ti pammilin ni Philippine National Police (PNP) acting chief Police Lieutenant General Jose Melencio Nartatez Jr. nga iyalisto ti pannakaipila ti kaso administratibo tapno naan-anayen a maikkat iti serbisyo ti nadakamat a pulis no mapaneknekan a karaman iti napasamak a krimen.
