LAOAG CITY – Nakaalerto ti Ilocos Norte Police Provincial Office para iti maiwayat a tignay protesta kagiddan iti pananglagip ti maika-53 a tawen ti Martial Law ditoy pagilian inton Domingo, Septiembre 21.
Segun ken ni P/Lt.Col. Michael Bautista, pannakangiwat ti Ilocos Norte Police Provincial Office, adda dagiti pulis a maiwaras iti lugar a pakaiwayatan ti tignay protesta a pakairamanan ti Ilocos Norte Police Provincial Office, 1st Provincial Mobile Force Company ken dagiti dadduma pay a City ken Municipal Police Station.
Inbatadna a maipalubos ti pannakaiwayat ti tignay protesta iti Aurora Park gapu ta maibilang daytoy kas Freedom Park.
Inlawlawagna nga adda ti karbengan ti asinoman nga umili a makipagpaset iti tignay protesta tapno ipeksa dagiti arungaing ken panawaganda iti gobierno nangruna iti kumarkaro a korapsion ditoy pagilian.
Kunana a saan nga agpangadua ti kapulisan a manglapped kadakuada no bilang adda dagiti madangran wenno mapasamak a riribuk kabayatan ti tignay protesta.
Maipalagip nga inrakurak ni Ms. Angel Galimba, mangidadaulo ti Kabataan Partylist Ilocos a mangiwayatda ti tignay protesta a pakipagpasetan dagiti mannalon ken mangngalap manipud kadagiti nagduduma a gunglo, United Church of Christ in the Philippines, Roman Catholic pakairamanan dagiti agtutubo.
