LAOAG CITY – Nakasaganan ti Ilocos Norte Police Provincial Office (INPPO) para iti panagpila ti Certificate of Candidacy (COC) mangrugi intono bigat, Oktubre 1 agingga intono Oktubre 8.
Daytoy ti inpasigurado ni Provincial Director Police Col. Christoper Abrahano.
Inbaga na a kas pammaneknek ket nangiyuswat da kangrunaan na dagiti kameng ti pulisya a naiwaras kadagiti comelec offices ti simulation exercises kadagiti nagduduma a senaryo a possible mapasamak kadagiti lugar a pagpilaan ti COC.
Innayon ni Abrahano nga ad-ado ti maiwaras a kameng ti pulisya iti comelec office ditoy ciudad ti Laoag no ikompara kadagiti nagduduma nga ili ditoy probinsya.
Kuna pay ni Abrahano a ditoy ciudad ti Laoag ket dua ti pagbantayan da gapu ta adda ditoy ti provincial office ti comelec ken ti city comelec office.
Inpasigurado ti provincial director a saan laeng a seguridad iti comelec offices ti sinaganaan da no di ket dagiti pay possible a saan a mapakadaan a mapasamak kabayatan ti panagpilaan ti COC dagiti agpaidasig intono May 2022 elections.
