LAOAG CITY – Saan a nagpaudi ti Ilocos Norte Police Provincial Office iti panangidaulo ni Provincial Director Police Col. Frederick Obar a nagselebrar ti Valentine’s Day ditoy probinsya.
Maysa kadagiti nakaawis iti imatangan ti umili ket ti insayangkat a zumba dagiti kameng ti pulisya iti Aurora Park ditoy ciudad ti Laoag.
Segun ken ni Police Major Sheryl Guzman, ti pannakangiwat iti Ilocos Norte Police Provincial Office, gagem da nga iparikna ken ipakita iti publiko a saan laeng nga agtiliw ken agsita kadagiti aglabsing iti linteg ti ar-aramiden da no di ket sidadaan da pay nga agselebrar iti kaaldawan dagiti puso.
Maragsakan ni Guzman gapu ta ado dagiti umili a nakipaset iti inwayat da a zumba.
Malaksid iti zumba, ket sinorpresa pay dagiti kameng ti pulisya dagiti motorista a nagdalyasat iti sentro ditoy ciudad ti Laoag babaen ti panangipaay da ti sabsabong.
