LAOAG CITY – Nakapagpiyansan ni Police Staff Sergeant Ryan Paiste Domingo, agtawen 34, naasawaan, nakadestino iti PIU-INPPO, residente iti Barangay 30-B, Sta. Maria ditoy ciudad ti Laoag.
Daytoy ket kalpasan a naarestar ken napilaan ti reklamo nga alarm and scandal gapu iti panagpap-paputok na ti paltog iti mismo a balay da.
Inbatad ni Police Major Rely Layug, ti pannakangiwat ti Ilocos Norte Police Provincial Office (INPPO), iyur-uray da pay laeng ti investigation report ti imbestigador iti PNP-Laoag sakbay a mangiyuswat met ti imbestigasyon ti Provincial Internal Affairs Service (PIAS).
Segun ken ni Layug, ti inisyal nga impormasyon kadakuada ket nagpap-paputok ti paltog ni Domingo kalpasan a nagriri da iti asawa na iti saan a masinunuo a rason.
Inpasingked ni Layug a saan da a kunsintiren ti siasinno man a kameng ti pulisya a nakaaramid ti mailabsing ti paglintegan.
Innayon na a no adda ti aglabsing ti paglintegan a kas ti inaramid ni Domingo ket masapol a mapatawan ti maiyannatop a pannusa.
