LAOAG CITY – Insardengen ti Department of Social Welfare and Development (DSWD) iti rehiyon uno ti agawat ti aplikasyon dagiti estudyante para iti educational assistance.
Daytoy ti inbatad ni Mrs. Marie Angela “Lala” S. Gopalan, ti Regional Director ti Department of Social Welfare and Development (DSWD) iti rehiyon uno gapu ta ti laengen aramiden da ita a lawas ket ti agpa-payout kadagiti benepisyaryo.
Segun ken ni Gopalan, ti pakabuklan a pondo para iti nasao a programa iti rehiyon uno ket 100.6-milyon a pisos.
Inlawlawag na nga 67 a porsienton ti naibunong da idinto a 33 a porsiento pay ti nabati a katukad ti sumuruk-kumurang a 33 a milyon a pisos.
Nupay kasta, kuna ni Gopalan a saan na a maibaga no mano pay a benepisyaryo ti mabunungan gapu ta agduduma ti maited nga educational assistance, depende no ti benepisyaryo ket elementarya, sekondarya wenno kolehiyo.
Inpakaammo na a ditoy Ilocos Norte ket addan ti 20 a porsiento ti nailatang a pondo ti naibunung.
Inpanamnama ni Gopalan a maibunung da amin ti nailatang a pondo agingga intono sabado, Setyembre 24 a panagngudo ti program ti gobierno.
Kabayatanna, inpasingked ni Gopalan a saan da nga ibelleng dagiti dadduma pay nga aplikasyon ken endorsement a naawat da manipod iti nagduduma a lokal a gobierno iti intero a rehiyon uno a saanen a maipaayan ti educational assistance.
Kuna na nga ikarigatan da ti agbiruk ti pondo tapno maipaayan ti tulong pinansyal dagiti maseknan.
