LAOAG CITY – Nagsagaba ti sugat iti barukong ti maysa a lalaki kalpasan ti napasamak a pammagkong iti maysa a pasdek negosyo iti Brgy. 13 ditoy siudad ti Laoag.
Nabigbig ti biktima nga agtawen ti 37, naasawan ken residente iti Brgy. 27 ditoy siudad idinto a ti suspek ket agtawen ti 24, baro ken residente iti Brgy. 20 iti ili ti Badoc.
Iti imbestigasyon ti PNP-Laoag, kabayatan a rumuar manipod iti comfort room ti biktima ket kellaat a linib-at ti suspek ti ulo na ken dagus a binagkong na daytoy.
Dagus a nagpaarayat ti biktima a nagsagaba ti sugat iti barakong ken naipan iti ospital idinto a nagtalimpuangaw ti suspek.
Kabayatanna, kalpasan ti naiyuswat nga hot pursuit operation ket naduktalan met laeng ti suspek iti warehouse ti manarimaan ti konstrukyon a pasdek ti provincial capitol.
Karaman nga insuko ti suspek ti jacket na a dara-dara ken immunan nga inpalemmeng na iti nobya na.
Nagtalinaed ti suspek iti kustodyar ti PNP-Laoag bayat a maisagsagana ti maiyannatop a kaso a maipila kontra iti daytoy.
Immunan a narekobre dagiti otoridad iti nakapasamakan ti insidente ti cellphone ti suspek pakairamanan ti kutsilyo nga agatiddog iti 13 a pulgada ken nausar iti pammagkong.
Rumrumuar a ti motibo iti nasao nga insidente ket ti 10,000 a ribo a pisos nga utang ti suspek ken ti nobya na manipod iti biktima.
