LAOAG CITY – Kinumpirmaran ni PCol. Christopher Abrahano, ti provincial director ti Ilocos Norte Police Provincial Office (INPPO) a ngimmato ti bilang dagiti insidente ti pammaltog ditoy probinsya ita a tawen.
Kuna na a manipod iti 20 a bilang dagiti insidente ti pammaltog ket nagbalin a 25 ita a tawen.
Immunan nga inlawlawag ni Abrahano a kaaduan kadagiti nakapasamakan ti pammaltog ket iti pampubliko a lugar.
Kuna na a daytoy ti mangipakita nga awan ti pilpilien a lugar dagiti suspek ti pammaltog.
Mainaig iti daytoy, gutgutiguten ni Abrahano dagiti umili a dagus nga agreport nu bilang adda ti maripar a naidumduma a garaw dagiti tattao iti aglawlaw tapno malapeddan ti dakes a pasamak.
Innayun na a kanayun a silulukat dagiti amin a kuerpo ti pulisya ditoy probinsya tapno maipaay ti tulong pangseguridad.
Naamoan a kangrunaan a nakapasamakan dagiti nairekord a pammaltog ita a tawen ket iti ili ti San Nicolas, Solsona ken Sarrat.
