LAOAG CITY – Nakagun-od ti P51.7 milion ti “Insidious: Out of the Further,” ti kaudian a installment iti blockbuster horror franchise pananglukatna kadagiti sinehan ti Pilipinas, basar ti distributor a Columbia Pictures.
Kinuna ti distributor iti maysa a press statement a ti pelikula ket nangipasdek ti rekord para iti “biggest opening day of all time for a horror movie in the Philippines”.
Nagdudupudop dagiti horror movie lovers kadagiti sinean, no sadinno nga addaan iti sumagmamano a sinean ti midnight screenings, a timmulong iti maikanem nga “Insidious” a pelikula a makagun-od iti agdagup a P51,682,703.
Naisentro ti baro a pelikula ken ni Gemma, nga in-play ni Amelia Eve, maysa nga agtutubo nga ina a mangpadpadakkel iti balasangna iti balay a dimmakkelanna.
Naduktalanna a mabalinna ti agbiahe iti The Further, maysa a purgatorial a pagnanaedan dagiti napukaw a kararua. Nupay kasta, di nagbayag, maamiris ni Gemma nga ad-adu pay ti maaramidanna ngem ti iseserrek iti ridaw, mabalinna pay nga isubli ti aglemlemmeng iti uneg daytoy iti pudno a lubong.
Kinuna ni Direktor Jacob Chase iti Agence France-Presse a ti pelikula ket mangipakita kadagiti pakadanagan ti panagbalin a baro a nagannak, a nagguyoden manipud iti bukodna a padas ti panagbalin a maysa a nagannak iti umuna a gundaway.
