LAOAG CITY – Binalakadan ti maysa a doktor dagiti tattao a saan a rumbeng nga inaldaw ti pannangan kadagiti instant wenno processed food.
Segun kenni Internist doctor Oyie Balburia, saan a nasayaat iti salun-at ti pannangan kadagiti instant wenno processed food gapo ta nangato ti sodium content na wenno ado ti asin daytoy.
Inbatad na nga ado ti asin dagiti nasao a produkto tapno agpaot ken mapukaw met ti sustansya daytoy.
Inlawlawag na a no saan met a maliklikan ket maminsan wenno mamindua laeng iti maysa a lawas ti pannangan kadagiti instant wenno processed food.
Naamoan nga irekrekomendar dagiti eksperto ti 2,300 mg. laeng ti sodium ti makonsumo ti maysa a tao iti maysa nga aldaw.
Ti 2,300 mg. a sodium ket maysa a kutsarita nga asin.
Mainaig iti daytoy, ti maysa a pakete ti instant noodles, ket umabot iti 1700 mg ti sodium ken dandani maabot na ti rekomendasyon.
Inbatad na a ti pannangan ti naapgad a taraon ket mangitunda ti sakit kas iti kidney stone, altapresyon, sakit iti puso ken dadduma pay.
