LAOAG CITY – Inbatad ni Mr. John Carlo Caldito, Tourism Instructor iti Divine Word College of Laoag (DWCL) ditoy ciudad ti Laoag ngem residente daytoy iti ili ti Pasuquin a naragsak iti ar-aramiden na a panagilugan a libre wenno free ride kadagiti mapan agtrabaho ken agawid iti nagduduma nga ili ken ciudad ditoy probinsya.
Inbatad na a kaadoan a mailuglugan na ket dagiti health workers ken dadduma pay a mangmangged nga apektado ti naipatungpal nga Enhance Community Quarantine gapu iti coronavirus.
Kuna na pay nga awan ti limitasyon na ti pagitulnugan na babaen iti lugan na a maysa a Mitsubishi Montero.
Inlawlawag na a nga amin a malabsan na a magmagna ket ilugan na ken mapan na itulnog iti pagturungan da uray kasano ti kaadayo na ditoy probinsya.
Inpasingked na nga adda met ti us-usaren na a thermometer a pagkita na ti temperatura dagiti ilugan na, malaksid pay iti ited na a libre a face mask ken sanitizer.
Innayon na nga uppat laeng ti mabalin na nga ilugan iti kada biyahe gapu iti pammilin a social distancing kas paset ti pagalagadan iti pannakaikabil iti Enhanced Community Quarantine iti intero a Luzon gapu iti Coronavirus.
Kuna pay ni Caldito a makaammon ti Diyos a mangsupapak iti ar-aramiden na.
