LAOAG CITY – Inyuswat ti Ilocos Norte Police Provincial Office (INPPO) ti interfaith prayer kas paset ti panagsagana da iti 2019 midterm election.
Daytoy ti inbatad ni Police Chief Inspector Relly Layug, mangidadaulo ti Police Community Relations Office iti Camp Valentin S. Juan.
Kunana nga indaulwan daytoy ni Provincial Police Director Senior Supt. Cesar Pasiwen ti nasao nga aktibidad.
Gagem ti nasao nga addang tapno saan nga agpadiktar dagiti kameng ti Philippine National Police (PNP) kadagiti pulitiko wenno kandidato.
Malaksid iti daytoy, kalikagom pay ti kapulisan ti balligi, naurnos ken natalna nga eleksyon intono Mayo.
Naamoan nga adda ti representative ti kada istasyon ti pulisya ti nagatendar iti naiysuwat nga interfaith prayer.
