LAOAG CITY – Balligi ti pannakaisayangkat ti International Human Rights Day ditoy probinsia.
Segun ken ni Fr. Randy Manicap, saan laeng a marambakan no di ket masapol a kitaen dagiti nagduduma a panaglabsing iti Human Rights a mapaspasamak iti babaen ti administrasion ni Pres. Ferdinand Bongbong Marcos Jr.
Inbatadna a nagtitipon dagiti miembro manipud kadagiti nagduduma a simbaan ditoy probinsia tapno pasingkedan ti karebbengan iti Human Rights.
Kunana a nabayagen nga agpanpanawaganda para iti hustisia dagiti amin a biktima iti panaglabsing iti karebbengan dagiti tattao.
Mainaig iti daytoy, saan nga inlibak ni Fr. Manicap nga adda dagiti mapaspasamak a panagsalungasing iti Human Rights ditoy probinsia kas ti panaglabsing iti karebbengan dagiti lider.
Innayonna a makapaspasar dagiti padana nga agpapaay iti simbaan ti reg tagging malaksid laeng kadagiti dadduma pay a grupo.
Kabayatanna, naammoan a nangiyuswatda ti panagkararag kas maysa a wagas iti panangkiddaw iti suporta iti Dios ken matungpal dagiti kalikagumda a banag.
