LAOAG CITY – Inlawlawag ni Atty. Arnedo Valera, maysa nga International lawyer a nakabase idiay Washington DC, USA dagiti opinyon wenno panirigan na iti idadalan ti HMS Queen Elizabeth ti United Kingdom iti West Philippine Sea.
Segun kenni Atty. Valera, ti panaglayag ti HMS Queen Elizabeth a dumalan iti WPS ket paset iti joint and multilateral exercise no sadinno ket karaman ti Estados Unidos, Australia, Japan ken ti France.
Kunana a malaksid iti joint and multilateral exercise, mangiyuswat pay dagitoy ti freedom of navigation ken ti innocent passage.
Inpetteng na a nalawag a kalikagom nga ipakita dagitoy a paset da iti global security nupay saan daytoy a claimant iti WPS ngem nagpirma da met iti law of the sea.
Nupay kasta, kunana a rumbeng nga awan ti maaramid nga aksyon wenno addang a mangitunda ti gubat.
Mainaig iti daytoy, kunana a nalawag met ti rakurak ti UK a no mapan da iti West Philippine Sea ket 10 a milya ti kaadayo da iti pagin-innagawan a teritoryo.
Patien na nga awan met ti mapasamak a gulo iti daytoy nga addang ti HMS Queen Elizabeth gapo ta ammo met dagiti pagilyan a makipagpaset iti joint exercise iti rehiyon a saan da a mabalin a sumrek iti regional conflict.
Inbatad na nga kapada met laeng daytoy iti napasamak idi 2018 a nagbyahe met ti HMS Albion a nangiyuswat met ti freedom of navigation no sadinno ket nagbalin nga agresibo ti China babaen iti panangsurot ti Chinese warships daytoy ken nangipatayab da ti aircraft iti British vessel.
Naamoan a ti Her Majesty Ship wenno HMS Queen Elizabeth ket isu ti kadakkelan ken kabibilegan a modern aircraft carrier ti United Kingdom, ken aglaon daytoy ti 18 a British-American F-35 fighter jets, 1700 crew, ken 250 nga American marines.
