LAOAG CITY – Nagbinnulig ti international pizza chain ken sikat a ramen shop idiay Japan tapno makaaramid ti naidumduma a pizza.
Ti naidumduma a pizza ket napanaganan ti “Kotteri-fuu Ramen Pizza”. Ti sarita a “Kotteri-fuu” ket maysa a sarita dagiti Japanese a ti kayatna a saoen ket “thick style.”
Daytoy met ti awag ti digo ti ramen a maiserserbi iti Tenkaippin ti nabirngasan kas No. 1 ramen shop iti intero a Japan.
Basar iti spokesperson ti Tenkaippin, napanunotanda a maki-collaborate iti international pizza chain tapno ipakita a mayat met nga aramiden ti toppings iti pizza ti sikatda a ramen.
Makita iti promotional photos ti nasao a ramen pizza a dagiti toppings daytoy ket prito a ramen noodles, green onions, pork chashu ken imbes nga aramid iti kamatis ti pizza sauce daytoy, ti inusar ket sauce manipud iti pinasam-it a digo ti ramen.
Inbatad ti pannakangiwat ti Tenkaippin, maysa a tawen a na-finalize ti sauce ti ramen pizza gapu ta inadalda a naimbag no kasanoda a mapasam-it ken mapagtalinaed ti orihinal a raman iti daytoy.
Aggatad ti 1,980 Yen a katukad ti P753 ti maysa a ramen pizza ken mabalin a magatang laeng idiay Japan.
