LAOAG CITY – Inpasigurado ni Dr. Prima Fe Franco, vice president for academic affairs iti Mariano Marcos States University (MMSU) iti siudad ti Batac a kabaelan nga akomodaren ti unibersidad ti internet workload dagiti estudyante ken mangisursuro.
Segun kenni Franco, napigpigsa ti internet connection iti kada kolehiyo kas paset ti blended learning ken gapo ta basbassit ti manamnama a sumrek nga estudyante.
Mainaig ti daytoy, kuna na a makaumanay dagiti study area dagiti agad adal.
Inbatad na nga adda dagiti classrooms iti nasao nga unibersidad a bakante a mabalin nga usaren dagiti estudyante nga addaan ti online classes nu bilang adda ti kageddan nga online lecture ken laboratory subjects, malaksid laeng kadagiti estudyante nga agur-uray ti sumaruno a laboratory subjects.
Innayon ni Franco nga adda ti center for flexible learning nga isu ti maysa kadagiti naiyestablisar nga usaren dagiti agad adal.
Malaksid ti daytoy, adda pay dagiti naidesignar a pagtalinaedan dagiti mangisursuro para iti panangisuro da iti online.
