LAOAG CITY – Kalpasan nga inruar ti warrant of arrest ti Korte, plano ti gobierno nga agkiddaw ti tulong iti International Police Organization tapno maisubli ditoy pagilian ni Atty. Harry Roque nga agdama nga adda idiay Netherlands.
Ni Roque ket addaan dagiti kaso a qualified human trafficking kaduana ni Cassandra Ong ken 48 a dadduma pay kalpasan a naduktalan ti scam hub idiay Porac, Pampanga.
Inbatad ni Palace Press Officer Atty. Claire Castro, nadakamat ni Undersecretary Nicky Ty ti Department of Justice a makikoordinarda iti Interpol tapno maipasubli ditoy pagilian ni Roque.
Inpettengna a saan a nainkalintegan ti rason ni Roque a saan a mabalin nga arestaren isuna ti Interpol gapu ta adddan pay daytoy ti pending nga application para iti political asylum.
Daytoy ket gapu ta adda ti warrant of arrest kontra ken ni Roque ken addaan ti kaso a sangsangoenna ditoy Pilipinas.
Kunana a ti kasapulan ket paneknekan ni Roque ti depensa daytoy a political harassment ti ar-aramiden ti gobierno kenkuana gapu ta no awan ti nangibasaran ti kaso a naipila kenkuana ket saan koma daytoy a naisyuan ti warrant of arrest ti Korte.
Maipalagip a ni Roque ken dadduma pay a padana nga akusado iti non-bailable case a qualified human trafficking ket immunan nga inisyuan ti Angeles City Regional Trial Court (RTC) ti warrant of arrest.
Naammoan nga adda ti pakainaigan ti kaso iti maipagarup nga iligal nga aktibidad ti Lucky South 99 a maysa a Philippine Offshore Gaming Operator (POGO) idiay Porac, Pampanga nga inpaserra ti gobierno.
Ni Roque ket rimmuar iti pagilian kalpasan a nairaman ti naganna iti Philippine Offshore Gaming Operator.
Iti agdama, adda idiay The Netherlands ni Roque ken agkidkiddaw ti political asylum.
