LAOAG CITY – Kiniddaw ti Philippine National Police ti red notice manipud iti International Criminal Police Organization no bilang rummuar ditoy pagilian ti negosiante a ni Charlie “Atong” Ang.
Inbatad ni Criminal Investigation and Detection Group (CIDG) Director Maj. Gen. Robert Morico II, daytoy a tignay ket tapno masigurado nga insigida a maarestar ni Ang.
Mamatida nga adda pay laeng ditoy Pilipinas ti mabirbiruk a negosiante ken awan pay ti impormasion a nakaruaren ti pagilian ni Ang.
Mainaig iti daytoy, inrakurak ni Interior and Local Government Secretary Jonvic Remulla nga uray iti panagturong iti backdoor ket marigatan nga aramiden ni Ang gapu ta adda dagiti asset ti Philippine National Police a mabalin a makaipaay t impormasion.
Kiddawen pay ti Department of the Interior and Local Government iti Department of Justice a mangiparuk-at ti Hold Departure Order ken ni Ang tapno maipasigurado a saan daytoy a makaruar ditoy pagilian.
Naminsan manen nga immapela ni Remulla ken ni Ang a kusa nga isuko ti bagina kadagiti otoridad.
