LAOAG CITY – Inkararagan ti Ilocos Norte United Muslim Association ti pannakaisardengen ti gubat iti Middle East kagiddan iti pannakaselebrar ti Eid’l Fitr ita nga aldaw.
Segun ken ni Mr. Aleem Yassin Ampuan Abidin, pannakabagi ti Ilocos Norte United Muslim Association, maysa kadagiti nagbalin a linaon ti kararagda ket ti panangkiddawda nga agsardengen ti rinnupak a mapaspasamak gapu ta naruay nga indibidual pakairamanan dagiti padada a Muslim ti mairamraman gapu iti riribok.
Inbatadna a kalikagumda a malpasen dagiti gubat a mapaspasamak kadagiti nagduduma a paset ti lubong gapu ta kakaasi dagiti tattao a maap-apektaran.
Inlawlawagna a nagkaykaysada amin a Muslim babaen iti panagkararag a maysa a wagas iti panangipakitada iti panagyamanda ken ni Allah a nakumpletodan ti 30 nga aldaw a panag-fasting wenno panagayuno dagitoy.
Innayonna a daytoy nga aktibidad ket maibilang a maysa kadagiti kapapatgan kadakuada a Muslim kas panangselebrar iti Eid’l Fitr.
Kabayatanna, ti Eid’l Fitr ket maysa a napateg a religious holiday dagiti Muslim iti intero a lubong ken panagngudo ti Ramadan, ti Islamic holy month of fasting wenno sawm.
