LAOAG CITY – Nailungalong ti pannakabaliw ti investment ken incentive code iti ili ti San Nicolas.
Segun iti Bise Mayor iti ili ti San Nicolas, gagem ti nasao nga addang ket tapno ad-ado pay dagiti umili a magutigut nga agnegosyo.
Kunana nga iti ili ti San Nicolas ket maysa kadagiti ar-araken dagiti negosyante ken mamati a babaen iti nasao nga addang ket maikkanda ti napinpintas nga insentibo.
Kabayatanna, inlawlawag ni Ms. Jean Merry Tila, ti mangidadaulo iti Business Permit and Licensing Office iti ili ti San Nicolas, a ti agdama nga incentive code ket saan unay maipatpatungpal isut gapuna a babaen iti nasao a lungalong ket ad-adda a mapaigetan ken specific dagiti maipaay nga insentibo dagiti negosyante.
Inyarig ni Tila ti 5 years tax holiday para kadagiti dadakkel nga establisimento no dagitoy ket naruay ti iyemplyo da nangruna kadagiti residente iti nasao nga ili.
Innayon na nga adda pay ti investment board ngem saan nga aktibo isut gapuna nga awan unay ti manggungundaway kadagiti insentibo gapu ta saan a kompleto dagiti dukomento a kasapulan.
Nupay kasta, kunana nga adalen da a nasayaat daytoy nga addang tapnu napinpintas ti maipaay nga insentibo kadagiti agpuunan ken magutigot da pay dagiti negosyante.
Iti agdama ket adda iti maikadwa a pannakaibasa ti nasao a lungalong.
