LAOAG CITY – Pursigido ti gobierno probinsial ti Ilocos Norte babaen iti Investment Office a mangitandudo ti “investment” idiay Hawaii ken Los Angeles, California nangnangruna kadagiti balikbayan.
Mainaig iti daytoy, inpakaammo ni Mrs. Rona Leigh Bueno, mangidadaulo iti nadakamat a pangopisinaan a dagiti ipresentarda iti kaaddda kadagiti nadakamat nga estado ti America ket dagiti kangrunaan nga industria ditoy probinsia.
Inlawlawagna a napagsasaritaandan kadagiti kallabes a taripnongda itay napalabas a tawen no ania dagiti napipintas a pagbinnuligan ti Hawaii ken ti Ilocos Norte.
Inbatadna a daytoy ti rason nga adda dagiti inkuyogda a pannakabagi ti pribado a sector.
Kunana a namnamaenda nga adda ti mabukel a “partnership” iti nagbaetan dagitoy ken dagiti kameng ti Filipino Chamber of Commerce in Hawaii.
Mamati a babaen iti daytoy ket maipalawa dagiti maseknan ti negosyoda idiay Hawaii.
Kunana a karaman ditoy dagiti industria nga adda pakainaigan ti Information Technology and Business Process Management, import ken export kadagiti produkto ti probinsia pakaibilangan ti service export.
Malaksid iti daytoy, inpalgakna a puntiria pay dagitoy dagiti renewable energies idiay Hawaii ken Los Angeles, tour operator connectivity ken hospitality industry.
Kagiddan daytoy, inpasigurado ni Gob. Matthew Marcos Manotoc a tumulong a mismo kadagiti agngayangay a negosiante nga umay agpuunan ditoy probinsia tapno awan ti ania man a tumaud a problema iti panangirubuatda ti negosio ditoy Ilocos Norte.
