LAOAG CITY – Saan pay a masigurado ti Ilocos Norte Water District (INWAD) ken Prime Water no inton kaano a maikali dagiti tubo da iti nabati a paset ti Gomburza St. paset ti Bgy 4 agingga iti Bgy 2 ti ciudad ti Laoag a nasemento.
Daytoy ti inbatad ni INWAD Gen. Manager John Teodoro kalpasan a nadillaw ti awang ti nasemento a paset ti nasao a kalsada.
Segun ken ni Teodoro, gapu iti kaawan ti Manager ti Prime Water ket saan na a madisidir no inton kaano ti pannakaikabil dagiti tubo da.
Nupay kasta, kinuna ni Teodoro a gapu iti itataod ti problema kas iti pagummungan ti danum a posible a pagyanan dagiti lamok ket ginaburan da pay laeng daytoy.
Inlawlawag ni Teodoro a kiniddaw da iti gobyerno ti ciudad nga ibati da ti saan a nasemento a paset na a no sadinno nga iti igid na gapu ta no masemento daytoy ken bakbakenda, gastos to manen dagiti konsesonaryo.
Mainaig iti daytoy, nagkiddaw manen ni Teodoro ti panagawat ken panagan-anos dagiti umili iti paset ti nasao a kalsada agingga a malpas ti proyekto da.
Nagyaman met dagiti residente gapu ta nagaburan met laengen ti problema da a nabati a paset ti nasao a kalsada.
