LAOAG CITY – Kalikagum ti Ilocos Norte Youth Development Office a mapagbalin ti “Sirib Awards” a maysa kadagiti kangrunaan nga aktibidad iti provincial fiesta iti kada tawen.
Mainaig iti daytoy, inlungalong ni Sang. Kabataan Federated Pres. Eldritze Viernes, chairman ti Committee on Youth iti Sang. Panlalawigan ti maysa nga ordinansa a nakailanadan dagiti baro a pagalagadan iti pannakaipatungpal ti Sirib Awards.
Segun ken ni Mr. Willie Jake Sib-at, Ilocos Norte Youth Development Officer, iti kanito nga aprobaran ti Sang. Panlalawigan ti nasao nga ordinansa ken mapagbalin a naan-anay a linteg, mangrugi iti masungad a tawen 2027 ket maipaayan ton iti pormal a pannakabigbig ti lead awardee kas mangidaulo ken mangibagi kadagiti dadduma pay nga awardees wenno maipaayan ti pammadayaw.
Inlawlawagna a sipud nairubuat ti Sirib Awards idi tawen 2014 ket saan a maipapaayan ti naidumduma a pannakabigbig ti lead awardee.
Nupay kasta, kunana nga iti kanito a maaprobaran ti ordinansa ket maysan daytoy kadagiti kadakkelan ti maawat nga insentibo.
Inbatadna a basar ti mailunglungalong a gakat ket maipaayan ti 20 ribu a pisos nga insentibo ti lead awardee ken saanen a ti insentibo a naituding a maipaay kenkuana iti pannakairaman na iti Sirib Awards.
Malaksid iti daytoy, inbunannag ni Sib-at a karaman pay iti ordinansa ti pannaka-institutionalize ti posthumous award wenno awards a nainagan kadagiti nagduduma nga Ilocano kas kadagiti banuar a da Dona Josefa Llanes Escoda, Juan Luna ken dadduma pay.
