LAOAG CITY – Dakkel a pammadayaw para kadagiti agtutubo ti Ilocos Norte ti nagun-od ti Ilocos Norte Youth Development Office (INYDO) iti Philippine Sangguniang Kabataan Awards.
Daytoy ti inbatad ni Mr. Willie Jake Sib-at, presidente ti Ilocos Norte Youth Development Office kalpasan a nabigbig kas Outstanding Local Youth Development Office national awardee ti organisasyon da.
Kuna ni Sib-at a kas presidente ket inaplikaran na ti indiaya a pammigbig babaen iti pammalubos ni Governador Matthew Marcos Manatoc.
Inlawlawag na a ti kangrunaan a nagibasaran iti pannakabigbig da kas Outstanding Local Youth Development Office ket nu kasano ti kinaaktibo ti opisina iti panangiyimplimentar ti development programs kadagiti agtutubo.
Inbunannag na a pasado ditoy ti opisina da babaen iti tulong ti Ilocos Norte Youth Development Council ken ti Sannguniang Kabataan ti probinsya.
Malaksid kadagiti programa, inbatad na a karaman kadagiti criteria ket nu adda ti makaanay a polisiya ti probinsya maipanggep iti pagsayaatan dagiti agtutubo.
Immuna iti daytoy, inpakammo ni Sib-at a malaksid iti Ilocos Norte Youth Development Office ket umabot iti 25 amin nga opisina ti nabigbig kas national awardee.
Naamoan a ti Ilocos Norte Youth Development Office iti Sirib Express ket nangrugi idi 2014 babaen ti panangidaulo ni dati a gobernador ken itan ket senador Imee Marcos.
Innayun ni Sib-at a saan met a daytoy ti ummuna a gundaway a nakaala ti opisina da ti pammadayaw.
