LAOAG CITY – Kasapulan ti iodine iti bagi ti maysa a tao iti inaldaw a panagkonsumo tapno maliklikan ti micronutrient deficiency.
Segun ken ni Ms. Mercy Lenn Arzadon, ti Dietician iti Mariano Marcos Memorial Hospital and Medical Center iti siudad ti Batac, napateg ti iodine kadagiti ubbing, agtutubo ken natataengan wenno aniaman nag edad ket kasapulan daytoy.
Inbatadna a dakkel daytoy a tulong iti bagi nangruna para kadagiti babbai tapno maiyadayoda ti nagduduma a sakit kas ti goiter wenno ti panagdakkel ti thyroid gland.
Inlawlawagna a no masobraan met ti mangan kadagiti naaapgad a makan ket adda ti dakes nga epektona iti salun-at iti maysa nga indibidual.
Mainaig iti daytoy, kuna ni Ms. Arzadon a maibasar iti National Nutrition Council ti iodine content a mairekomendar kadagiti indibidual nga agtawen ti 0 agingga lima ket 90 micrograms, agtawen ti innem agingga 12 ket 120 micrograms, agpada a lalaki ken babai ket 150 micrograms, pregnant and nursing women ket adda ti nayon a 100 micrograms iti kada aldaw.
Innayonna nga adda pay ti maala nga iodine content kadagiti maal-ala iti uneg ti kabaybayan.
