LAOAG CITY – Naglikudan ni Iranian Foreign Minister Abbas Araghchi a nagkiddawda ti ceasefire.
Inbatadna a saanda a pulos a nagkiddaw ti aniaman a negosasion gapu iti inwayat a panangatake ti Israel ken Estados Unidos.
Inlawlawagna nga awan ti makitkitada a rason no apay a kasapulanda a makisinnarita iti Amerika.
Inpettengna nga idi adda ti panagsinnaritada ket ditoy met a nagdesision ti Estados Unidos a mangiwayat ti panangatake iti pagilianda.
Kunana a nakasaganada nga agibales manipud iti gubat a pinili ni United States President Donald Trump.
Inpakaammona a silulukat ti Iran a makisarita kadagiti pagilian para iti natalged a panagdalyasatda iti Strait of Hormuz.
Naammoan nga addan ti sumagmamano a pagilian nga immasideg kadakuada tapno natalged ti aniaman a panangatake kadagiti barko dagitoy.
Inpaganetgetna nga awan ti plano ti Iran a biagen ti nuclear program-da.
